الجمعة، 10 أبريل 2009

صلاطة حقوق الإنسان

توّا ثمّة مدة طلع خبر قامت عليه الحفّالة في تونس و الموزيكا تضرب"و هللّو وكبّرو" و المزود خدّام "روّح مالسوق عمّار" و الصحافة التونسيّة تكتب على الإنجاز العظيم إلّي تزاد إلى رصيد الفتوحات الكبرى لبلادنا ألا وهو تعيين تونس في المجلس العالمي لحقوق الإنسان و أكثر ما يزيد فخرنا بهالخبر هو إنّو تسمّينا في هالمجلس مع شقيقتينا في مجال الدّفاع على حقوق الإنسان و هما المملكة السعوديّة و سوريا.
هذا التعيين جاء و من دون أدنى شكّ نتيجة للجهود العظيمة المبذولة من طرف هذه الدّول في مجال الحريّات العامّة و العالم رأى أنّه من المهمّ مكافأة الدّول المندمجة في مسار الحرية و حقوق الإنسان و تسميتها في المجلس الجديد باش يكونو قدوة لبقية البلدان.
مع الشّقيقات سوريا و السعودية نتصوّرو إلّي تونس تنجّم تحقّق إنجازات جبّارة و ربّما خلق أنواع و أجيال جديدة لحقوق الإنسان.
حاصيلو تلمّ اللّفت عالبوخريش قالو للبصل هيّا نعملو صلاطة

السبت، 4 أبريل 2009

القمة التاريخية

المصالحة التاريخية إلي صارت بين الزعيم الليبي الفذ الوسيم المستقيم المتوازن و صاحب الأفكار الخلاقة و العاهل السعودي القومي الشجاع المقدام و صاحب المواقف الرجولية كانت أهم ما ميز القمة العربية إلي صارت في قطر صاحبة الديبلوماسية الإنفصامية.
حيث وقتلّي جاء الزّعيم يسامح في الملك نعتو بالعبر إلّي في الدّنيا دي كلّها و قالّو إلّي هو كذّاب و إلّي هو صنيعة أمريكا و إلّي هو هارب من المواجهة... حاصيلو طيّبلو خاطرو بكلام يُثلج الصدور و يطيّر غمّة عالقلب.
غياب الرئيس المصري كان زاده حدث هام, مصر إلّي تعتبر نفسها زعيمة العرب...هي من ناحية زعيمة زعيمة...في الدفاع المتفاني على القضيّة و فتح المعابر وغلق السفارة و وقف التّطبيع و وقف تصدير الغاز المصري إلى إسرائيل,,, المهمّ قالّك إلّي مصر و قطر متنابزين على فازة صارت في عرس.
حاصيلو القمّة كانت غاية في النّجاح و هي الّتي أسفرت على بيان كالعادة.
البيان هذا تحفّظ عليه رئيس الوزراء العراقي على خاطرو لم يُشير إلى التطورات الأمنية إلي صارت في العراق.
التطورات تعني في عُوض 10 إنفجارات في اليوم ولاّو 7 برك لم تسفر سوى على 50 قتيلا و 10 ساقين مقصوصة و 100 حالة خجّان في العقليّة يوميّا.
مخّ الهدرة الزّنازة حامية و الميّت كلب

قمة العشرين

قمة العشرين إلتئمت و بعد التهديدات الفرنسية بلإنسحاب إذا لم يتم الإستجابة لمطالبها بفرض قيود على الأنظمة المصرفية و التشاؤم الألماني حولها , إلا أنها أفضت إلى نجاح باهر بشهادة فرنسا و ألمانيا.
على خاطر تم إقرار قيود على النظام المصرفي و زيد سكروها عاى الملاذات الجبائية les paradis fiscaux بالعربي, و فوق هذا الكل قلك تم الإتفاق على ضخ مبلغ 5 تريليون دولار لإنعاش الإقتصاد العالمي.
هو معروف إذا عطس الإقتصاد أمريكي أصيب العالم بالزكام خلي إذا تبلى بالحمى القلاعية فإن العالم أصيب بجنون البقر.
السؤال إلي مطيرلي نعيمي هو الآتي , زعمة بالحق لمريكان و أصحابهم باش يخرجو من جيوبهم هاك المبلغ؟
يااا ذنوبي تخرج الصدقة من حبس الجديد.....